MY FUNNY TRAFFIC LIGHT EXPERIENCE

My hurry hurry and ova sharp guy don make me to get ticket wey I no expect. Well..., I been kind of expect am. When I been comit de offence I kind of feel say dem catch me. And de mail wey I see for my mail box yesterday don confirm wetin I been tink.

Last two weeks I been travel go Indianapolis to go see my elder bros and him family. And I travel with 6:00pm flight. I book my flight late and de only ticket wey I find na evening flight. I arrange to drive from work to board my flight.

Dat experience don make me realize say ee fit be very bad idea to work de same day wey you need to fly. I close work den begin drive to airport. Tinking say I get enough time, I begin take my sweet time dey drive jejelly to de airport.

TAX RETURN

Dat time of de year wey govment go wan make you report ya sef don come again. From January to around middle April, everybody must file dem tax papers to IRS (na de oga kpata-kpata for revenue collection for yankee).

You go tell govment how much you make for the year wey just pass. Also how many people wey you take care of, like ya pikin or papa and mama. How much awoof money wey you give as charity and how many property wey you get as at last year.

Omo..., de tin dey very complicated. You get to fill out like ten forms and for each one you go make sure say no mistake dey inside. Any mistake, dat one don turn to fraud. And IRS for hia dey worse dan state CID for Naija. For hia de fia of IRS na de begining of wisdom.

TREE HOUSE

Some people dey find place to build house sotey dem come decide to build am for on top of tree. Yes oo..., tree as in leaves and branches. I see dis tin for one reality TV show where dem specialize for how to build tree house.

Na very interesting show. Dem go start from scratch. First, dem go decide de tree wey dem go wan use. Sometimes dem go choose two or three strong trees wey dey near each other. And most time na long pine trees or de type of tree wey de branch dey very very high.

MARY JANE


Maybe you neva hear about dis type of babe before, but she be very contoversial chick for yankee oo! Dos wey don friend her type say she go make you feel good. She go make you calm down. Oda times, she go make you laff well well and forget ya wahala for some time.

Depending for de State wey you meet her, ee fit dey legal to friend her OR very illegal to even dey around her. De number of people wey don go jail because of her plenty no be small. From old people to youngie dem and even teenagers, everybody don hia am for Mary Jane hand.

BOKO MARAM abi na BOKO MAGA

Na with serious vex for my mind wey I dey take write dis post. I don tire for dis people and dem madness. Everyday when I check Naija news online, na dem smelling stupid gist I go dey see. De tin don too much. Which time wey dem go stop dis kill kill.

You turn TV to hia news, na one of dos tory about Naija wey you just no wan hia go dey for news. Na wa for dis people. Ee don too much. God oo, we need ya helep for dis one. We govment no sabi wetin to do (dat one no surprise me at all).

EE DON TEY WHEN I BAFF COLD WATA

You no go know how lucky you dey until you lose sometin wey dey like common tin to you. For here, if I decide to baff hot wata five times everyday, I fit do am. I no go even worry about if wata heater dey work or if wata dey run for my tap. All I need to do na to turn my hot wata  tap and de shower go supply me with hot wata.

I no even fit remember de last time wey I baff with cold wata. Well..., I remember! Ee happen day before yesterday. I discover say my apartment wata heater no dey work. I need to baff, I don dey go late and so I no get enough time to boil wata for electric stove.

Omo mehn..., to pour de cold wata for my body no been dey easy at all. Na so I try to pour de wata for my body small small. And na so I dey withdraw my sef like say de tin dey shock me. See me way dey baff cold wata for Naija like no man business, come dey here dey form like say de tin dey new to me.
Related Posts Plugin for WordPress, Blogger...